Loading...

苦中作樂的澀

呢幾日同同事都四出暫時性送出部份口罩畀街坊,行到邊就問到邊,疫症期間,拾荒婆婆仍然如常開工。嫺姐(假名)喺我屋企附近執左好耐紙皮,我通常出去做野都好易見倒佢,有一日喺街頭企陣睇下佢係唔係啱啱拎車紙皮去磅,轉頭就見到佢。我見到佢嗰陣,感到好愕然,因為佢戴緊嗰個口罩有塊嘢喺前面,搵左個萬字夾夾住。行近啲睇,原來係塊紙皮仔!我好愕然問,佢點解咁醒,加多塊野擋住。(其實我知無用,不過嫺姐做得出可能佢覺得可以防到,所以暫時唔好話咁做無用先,哈哈!)跟住嫺姐講,佢個口罩已經戴左兩日,屋企無乜口罩,要慳啲駛,所以諗下諗下不如加塊嘢落去唔知得唔得呢?之後佢笑一笑話:「雖然我唔知得唔得,都係想感覺安全啲啫,哈哈。」

我無對佢嘅設計有任何嘅評論,可能好多人會覺得無用,但始終佢諗出嚟無理由掃佢興。不過我就講番其實口罩用左之後就唔好再用,同埋最後好日日換啦,重複用會有好多細菌喺個表面。嫺姐彈左句:「我知呀!電視有教嘅!」跟住大家就大笑左一陣。呢下大笑背地裡,我心裡面係有一點「澀」——呢種澀係好似我地都係喺到苦中作樂咁樣,明知呢個地方疫情好險峻,大家都好惶恐,甚至因為掌權者嘅失誤無能,而令我們感到絕望同憤怒,大家嘅心情都唔好過;呢種「澀」喺大家嘅笑談中滲出,實在又帶點諷刺同玩味,著實我地都透過分享與關懷喺呢個絕境裡面苦中作樂,輕輕嘆氣。

街坊真係好有意識去防禦,只不過真係無咁多儲備口罩要慳住,佢無中盲搶罩、盲搶廁紙嘅毒,只係無時間同「口罩控」去爭去排——因為佢負責嘅嗰個地方嘅回收物要經常清,佢好有交帶要盡責完成佢。社區就係有好多好似北角蘭姐所講嘅,呢行要做到「鐵腳馬,神仙肚」先得嘅拾荒工作者:鐵腳馬就係行得多嘛(日日無停手),神仙肚咪唔駛食野囉(忙到無得食)。市道雖然係慘淡,佢地仍然不斷盡力,可能你會問點解要用「盡力」呢個字呀?因為,佢地已經一把年紀,唔做得幾耐,佢地只能夠盡力去幫呢個社區執得乾淨,做好回收嘅工作。


有晚同老婆食完飯番屋企途中,去到公廁外見到兩個工友,一男一女喺到打牙骹,梗係二話不說同佢地吹下啦。

我:姐姐,你地夠唔夠口罩呀?
女:唉梗係唔夠啦,我地一日一個炸,你有無呀?
男:(摸一摸口罩邊)無呀,我帶左兩日啦呢個,要慳啲使呀。

跟住我喺袋到攞左兩包口罩畀佢地,然後佢地拍一拍我。

男:喂,使唔使畀番錢你呀?
(我好突然嚟唔切反應,可能而家一罩難求……)
女:哥仔你真係好人,好人有好報呀,啲判畀多個都唔肯呀。我地又買唔到口罩喎,都唔知點算。

我:除左戴口罩,記得要洗手洗手洗手喎。
女:嘻,我地日日洗手仲洗唔夠,洗屎塔又洗、洗地又洗,都唔知洗幾多次。
我:其實你地應該要有多個口罩替換啦,放工無理由仲戴住。
男:我呢個呀都係反轉戴炸。(心諗掉轉戴無用播,慘!然後勸佢唔好咁戴。)
女:好啦,而家有你嗰啲起碼頂倒幾日啦。

我個人覺得,工友係用最大嘅寛容去忍耐食環署對佢地嘅忽視,你估佢地唔知要保護自己?但係連本身工作嘅部門都唔願意去保護咁高危嘅工友,你話唔擔心就假。

啱啱收到林鄭記招話會每月定期派七十萬個口罩俾清潔工(政府外判公司),同事話食環署、康文署加埋房署差不多成五萬清潔工,每人一日一個,一個月都要百五萬個……七十萬個口罩究竟會落喺邊啲人嘅手呢?會唔會又無端端喺條街到見到有人交收CSI口罩呢?希望資源真係畀到最前線。而我地呢幾個月一定會聯同其他工會組織嚴密監察食環署有否待薄工友——本身已經待薄,希望唔好繼續落去。

(作者為新福事工協會關懷貧窮學校生命教育主任)


守護自由空間,請支持基督教《時代論壇》 
請選擇:💳 網上捐款(信用卡)
⚡️轉數快FPS - 51100803(註明奉獻,如需收據請附姓名及電話)

Donationcall
更多標籤
轉數快
HK Red Cross BTS
活學教育中心
靈溢公司