昨晚平安夜，「橫街愛共聚，窄巷滿佳音」參與者有八成係第一次參與，因為大部份都係第一次參與，所以理所當然就係唔知行動會做啲咩，我地組去到一個公園到，見到有班小朋友喺到玩，見組員有啲係中學生，應該玩得埋，於是請佢地一齊玩，結果班boyzreborn同細路玩左成粒鐘，好開心，係班細路玩班組員玩得好開心。
可能你睇以上嘅文字覺得冇咩特別，都知我地行動成日都係咁樣接觸街坊啦，有咩特別姐，不過我想講，係呀，睇落去好似好簡單，但係其實唔係好多社福機構同教會肯咁樣做，我指嘅唔係剩係佈道嗰隻，而係真係同街坊R吹水嗰隻，大家千祈吾好睇小R吹水呢樣嘢，佢係外展工作同支援街坊，建立社區工作，一樣好重要嘅能力。
當我地同細路嘅親人（在旁看住佢地嘅家長）搭訕，你就會知道俾所有扶貧委員會及報告更加詳盡同落地嘅社區狀況，因為街坊就係社區嘅持份者，佢地最能一手知道貧窮喺社區嘅肆虐同張牙舞爪，但係，唔係太多人會想做呢啲咁冇果效嘅嘢，而我地點解又要叫人去做呢？就係因為呢種同社區連結，令教徒同參與者可以做番一個有血有肉嘅人，呼吸社區氣息，學習教會同社區共存同行嘅操練。行動唔會即時為你帶來大量決志信主嘅人，但係會令你嘅教會群體成為街坊嘅窩心，成為佢地美麗嘅回憶，成為佢地相信自己仍存在於社區和群體嘅盼望。
Boyzreborn同嗰幾位玩嘅細路，正正就係同家人住喺嗰啲唔到八十呎嘅劏房，亦係成日俾港人排斥嘅內地家庭，佢地面對嘅唔容易唔係我地走去關心一兩句就可以冇嘢，而係需要整個群體對寄居者、對他者有更多嘅接納，當然呢個係需要一個漫長嘅時間去改變。
細路點解同幾位靚仔玩得咁癲，家長話係因為平時冇乜人同佢地玩，而且細路女仲識教番班哥仔玩遊戲，學Eddie 話，啲遊戲咁簡單先好玩，啱小朋友，俾佢地享受呢份簡單同直接，童年先有嘅快樂時光，我地大人連玩遊戲都要講程序講效果，其實應該玩番呢啲咁簡單咁治癒嘅遊戲先啱。
玩左成粒鐘，認識左街坊，第日落嚟又可以打個招呼再玩過，呢啲就係我地嘅服侍，睇落去簡單，卻係承載住社區嘅種種狀況同連結街坊嘅生命。好撒馬利亞人行動其實唔需要加個好字，做番撒馬利亞人咪知人與人之間，人與社區之間真實嘅情況。
PS: 臨尾我地走，兩個細路死攬住幾個哥仔吾放，表達一種好鍾意同佢玩同好唔捨得嘅心情，講需要關心需要愛，有好多小朋友都好需要，隨街都有幾個……
（作者為新福事工協會關懷貧窮學校生命教育主任）
（http://christiantimes.org.hk，時代論壇時代講場，2016.12.25）
