Loading...

资料库

时代讲场文章(至2017年2月14日)

做一个冇个「好」字嘅撒马利亚人

昨晚平安夜,「横街爱共聚,窄巷满佳音」参与者有八成系第一次参与,因为大部份都系第一次参与,所以理所当然就系唔知行动会做啲咩,我地组去到一个公园到,见到有班小朋友喺到玩,见组员有啲系中学生,应该玩得埋,于是请佢地一齐玩,结果班boyzreborn同细路玩左成粒钟,好开心,系班细路玩班组员玩得好开心。

可能你睇以上嘅文字觉得冇咩特别,都知我地行动成日都系咁样接触街坊啦,有咩特别姐,不过我想讲,系呀,睇落去好似好简单,但系其实唔系好多社福机构同教会肯咁样做,我指嘅唔系剩系布道嗰只,而系真系同街坊R吹水嗰只,大家千祈吾好睇小R吹水呢样嘢,佢系外展工作同支援街坊,建立社区工作,一样好重要嘅能力。
 
当我地同细路嘅亲人(在旁看住佢地嘅家长)搭讪,你就会知道俾所有扶贫委员会及报告更加详尽同落地嘅社区状况,因为街坊就系社区嘅持份者,佢地最能一手知道贫穷喺社区嘅肆虐同张牙舞爪,但系,唔系太多人会想做呢啲咁冇果效嘅嘢,而我地点解又要叫人去做呢?就系因为呢种同社区连结,令教徒同参与者可以做番一个有血有肉嘅人,呼吸社区气息,学习教会同社区共存同行嘅操练。行动唔会即时为你带来大量决志信主嘅人,但系会令你嘅教会群体成为街坊嘅窝心,成为佢地美丽嘅回忆,成为佢地相信自己仍存在于社区和群体嘅盼望。
 
Boyzreborn同嗰几位玩嘅细路,正正就系同家人住喺嗰啲唔到八十呎嘅劏房,亦系成日俾港人排斥嘅内地家庭,佢地面对嘅唔容易唔系我地走去关心一两句就可以冇嘢,而系需要整个群体对寄居者、对他者有更多嘅接纳,当然呢个系需要一个漫长嘅时间去改变。
 
细路点解同几位靓仔玩得咁癫,家长话系因为平时冇乜人同佢地玩,而且细路女仲识教番班哥仔玩游戏,学Eddie 话,啲游戏咁简单先好玩,啱小朋友,俾佢地享受呢份简单同直接,童年先有嘅快乐时光,我地大人连玩游戏都要讲程序讲效果,其实应该玩番呢啲咁简单咁治愈嘅游戏先啱。
 
玩左成粒钟,认识左街坊,第日落嚟又可以打个招呼再玩过,呢啲就系我地嘅服侍,睇落去简单,却系承载住社区嘅种种状况同连结街坊嘅生命。好撒马利亚人行动其实唔需要加个好字,做番撒马利亚人咪知人与人之间,人与社区之间真实嘅情况。
 
PS: 临尾我地走,两个细路死揽住几个哥仔吾放,表达一种好锺意同佢玩同好唔舍得嘅心情,讲需要关心需要爱,有好多小朋友都好需要,随街都有几个……
 
 
(作者为新福事工协会关怀贫穷学校生命教育主任)

http://christiantimes.org.hk,时代论坛时代讲场,2016.12.25)

Donationcall