之前有幾位前輩都有分享好多對扶貧、貧窮問題嘅見解，小弟唔再多寫呢啲理論，反而想用啲實際啲嘅處境同大家諗下咩叫關懷，咩叫同理心，每個例子都係我地親自落到區聽到嘅，唔係空想出嚟，而且反思嘅位仲係由街坊同參與者互相構成嘅，大家不妨諗下又試下落下區感受下社區點睇一啲人與事。
廿四號晚平安夜我地落左區去接觸街坊，有組行到一個公園，搵番一個早年喺到遇到嘅伯伯，佢問到伯伯知唔知今日係咩日子，伯伯：「知道，今晚係平安夜，平安夜基督徒先至出現……」呢句話令參與者印象深刻同反思到，我地嘅教會嘅門，係唔係大時大節先至會打開同出嚟呢？
嗱，咁你咁講教會又實話你做乜批評教會，但係你會見到，參與者唔係貿貿然去講呢啲嘢，況且佢根本冇批評教會嘅動機，只係因為接觸嘅對象同聽倒嘅心聲太真實，令佢心裡面有所反思，諗緊教會同社區之間嘅關係。平安夜係記念耶穌降生，要將呢個好信息分享俾人知，到今時今日，其實又點會冇人知平安夜嘅意義架？對於街坊嚟講，代入啲去諗，一個喺平安夜仲開緊工，心裡面仲諗緊： 「就嚟月尾手頭好緊，下個月仲要過年點算？」嘅人嚟講，平安夜真係可以平安？我地一句耶穌愛你可以安慰倒佢咩？
嗱你又可以話我 : 「你咁講就唔係好屬靈啦，耶穌嘅愛係真係可以安慰到人架。」呢樣嘢我明，但我會嘗試再諗多一點，呢份愛嘅彰顯或者呢個接觸街坊嘅舉動只係一個「耶穌愛街坊」嘅一個開始，唔係剩係廿四號晚，點解呀？你有耳可聽街坊講：「知道，今晚係平安夜，平安夜基督徒先至出現……」原來喺街坊眼中我地嘅愛只係喺平安夜先出現（想講唔係得呢個街坊咁講，而係不斷有街坊咁樣同參與者講過，每一年都係）。咁你又會話我啦 : 「嗱，咁你又唔好以偏概全喎，有好多教會都有做社關架啦，好多都有做扶貧工作喎。」係，呢樣我都知，係有教會去做緊，不過係唔係好多呢，咁大家可以睇番教新二○一四年最新嘅教會調查報告，喺呢度又唔需要多評亦未輪到我地去評啦。
剩係平安夜出嚟又好，定係已經做緊都好，我地都嘗試問一個問題：究竟教會係為社區而存在喺到，定係社區係為教會而存在呢？若果後者，社區係為教會而存在嘅話，即係教會喺社區做嘅所有嘢嘅目的都係為左教會而做，為左教會嘅發展，方向以及教會所詮釋嘅國度觀而去做社區嘅工作，咁能唔能夠對應倒社區嘅需要呢？
我記得有次見到有隊人上左去準備重建嘅唐樓報佳音，但呢班人原來唔知呢個範圍要重建，結果上左去同啲街坊講：「祝福你呀！耶穌同你一齊，你地會住得好開心架！」真係一講就令街坊把幾火，街坊以為班人幸災樂禍，於是講番佢地轉頭：「祝你個福呀，就嚟俾人趕走冇屋住啦，嚟攞景定贈慶呀，下？」嚇到班人一路講祝福你祝福你咁快步離開幢唐樓。
報佳音傳福音嘅活動絕對是一件美事，與街坊分享你嘅信仰都唔係唔好，但我地去做呢啲嘢嘅時候，心裡面究竟有冇代入一班街坊嘅處境去諗，又有冇諗到喺佢地嘅處境，福音、佳音係代表啲咩呢？會唔會係了解佢地嘅憂慮同重擔，承載一下基層嘅狀況，與之同行會係表達福音嘅一種呢？若我地願意站喺街坊嘅角度去諗平安夜嘅意義，又會否係讓佢地呢個被壓迫嘅底層生活得到一點安慰同平安？又或喺資本主義功利主義運作下嘅社會中，一班未被主流認同嘅勞動階層，對佢地作出真誠嘅欣賞同認同呢？
最後，當教會係嘗試為左社區而存在嘅時候，相信我地嘅視野同角度會更社會性向度，更為社區及街坊著想，以僕人嘅心去接待佢地，而唔係要街坊進入我地嘅屬靈系統中，讓信仰、讓佳音成為更融入鄰舍及受壓迫者嘅生活，唔好坐喺安舒嘅四幅牆裡隔岸觀火。
