Loading...

资料库

时代讲场文章(至2017年2月14日)

谁的佳音,谁的平安?

之前有几位前辈都有分享好多对扶贫、贫穷问题嘅见解,小弟唔再多写呢啲理论,反而想用啲实际啲嘅处境同大家谂下咩叫关怀,咩叫同理心,每个例子都系我地亲自落到区听到嘅,唔系空想出嚟,而且反思嘅位仲系由街坊同参与者互相构成嘅,大家不妨谂下又试下落下区感受下社区点睇一啲人与事。

廿四号晚平安夜我地落左区去接触街坊,有组行到一个公园,搵番一个早年喺到遇到嘅伯伯,佢问到伯伯知唔知今日系咩日子,伯伯:「知道,今晚系平安夜,平安夜基督徒先至出现……」呢句话令参与者印象深刻同反思到,我地嘅教会嘅门,系唔系大时大节先至会打开同出嚟呢?

嗱,咁你咁讲教会又实话你做乜批评教会,但系你会见到,参与者唔系贸贸然去讲呢啲嘢,况且佢根本冇批评教会嘅动机,只系因为接触嘅对象同听倒嘅心声太真实,令佢心里面有所反思,谂紧教会同社区之间嘅关系。平安夜系记念耶稣降生,要将呢个好信息分享俾人知,到今时今日,其实又点会冇人知平安夜嘅意义架?对于街坊嚟讲,代入啲去谂,一个喺平安夜仲开紧工,心里面仲谂紧: 「就嚟月尾手头好紧,下个月仲要过年点算?」嘅人嚟讲,平安夜真系可以平安?我地一句耶稣爱你可以安慰倒佢咩?

嗱你又可以话我 : 「你咁讲就唔系好属灵啦,耶稣嘅爱系真系可以安慰到人架。」呢样嘢我明,但我会尝试再谂多一点,呢份爱嘅彰显或者呢个接触街坊嘅举动只系一个「耶稣爱街坊」嘅一个开始,唔系剩系廿四号晚,点解呀?你有耳可听街坊讲:「知道,今晚系平安夜,平安夜基督徒先至出现……」原来喺街坊眼中我地嘅爱只系喺平安夜先出现(想讲唔系得呢个街坊咁讲,而系不断有街坊咁样同参与者讲过,每一年都系)。咁你又会话我啦 : 「嗱,咁你又唔好以偏概全喎,有好多教会都有做社关架啦,好多都有做扶贫工作喎。」系,呢样我都知,系有教会去做紧,不过系唔系好多呢,咁大家可以睇番教新二○一四年最新嘅教会调查报告,喺呢度又唔需要多评亦未轮到我地去评啦。

剩系平安夜出嚟又好,定系已经做紧都好,我地都尝试问一个问题:究竟教会系为社区而存在喺到,定系社区系为教会而存在呢?若果后者,社区系为教会而存在嘅话,即系教会喺社区做嘅所有嘢嘅目的都系为左教会而做,为左教会嘅发展,方向以及教会所诠释嘅国度观而去做社区嘅工作,咁能唔能够对应倒社区嘅需要呢?

我记得有次见到有队人上左去准备重建嘅唐楼报佳音,但呢班人原来唔知呢个範围要重建,结果上左去同啲街坊讲:「祝福你呀!耶稣同你一齐,你地会住得好开心架!」真系一讲就令街坊把几火,街坊以为班人幸灾乐祸,于是讲番佢地转头:「祝你个福呀,就嚟俾人赶走冇屋住啦,嚟攞景定赠庆呀,下?」吓到班人一路讲祝福你祝福你咁快步离开幢唐楼。

报佳音传福音嘅活动绝对是一件美事,与街坊分享你嘅信仰都唔系唔好,但我地去做呢啲嘢嘅时候,心里面究竟有冇代入一班街坊嘅处境去谂,又有冇谂到喺佢地嘅处境,福音、佳音系代表啲咩呢?会唔会系了解佢地嘅忧虑同重担,承载一下基层嘅状况,与之同行会系表达福音嘅一种呢?若我地愿意站喺街坊嘅角度去谂平安夜嘅意义,又会否系让佢地呢个被压迫嘅底层生活得到一点安慰同平安?又或喺资本主义功利主义运作下嘅社会中,一班未被主流认同嘅劳动阶层,对佢地作出真诚嘅欣赏同认同呢?

最后,当教会系尝试为左社区而存在嘅时候,相信我地嘅视野同角度会更社会性向度,更为社区及街坊着想,以仆人嘅心去接待佢地,而唔系要街坊进入我地嘅属灵系统中,让信仰、让佳音成为更融入邻舍及受压迫者嘅生活,唔好坐喺安舒嘅四幅墙里隔岸观火。

Donationcall