Loading...

資料庫

時代講場文章(至2017年2月14日)

認命的拒絕……

上一篇講到究竟教會為社區而存在,定係社區為教會而存在,進行左一啲反思,今次我地又抽左一段參與者嘅分享嚟諗下而家教會對於社區以及唔同嘅群體又有啲咩睇法。

有一組嘅參與者分享到:「行動中接觸到六十多歲執紙皮嘅叔叔,好健談嘅,返過某間大型堂會(不透露了,大教會又有幾多間?),對基督教都幾熟悉架,但係佢話教會話俾佢知教會較為艱難嘅位在於要去接納基層嘅街坊呀,精神病患者呀咁樣,唔識得去接待佢地或難啲同佢地一齊,於是個街坊咪知難而退。聽佢講都想搵到有接待到基層嘅教會,叫組員介紹俾佢。……」

從呢位拾荒叔叔口中嘅分享,其實都有啲幾搞笑,佢到訪嘅教會竟然咁坦誠同佢講佢地接待唔到基層街坊?(都唔知好唔好欣賞佢。)咁我想問,你地係會接待啲咩人呢?都未開始講對信仰嘅詮釋啦,而係作為一個接待任何人嘅群體,竟然會有一啲人係唔會接待嘅?仲要喺街坊面前當面拒絕接待佢,其實寫到呢到我都開始有啲亂,點解我地認識嘅基督教會發生呢種情況嘅呢?究竟係我地信嘅基督教有問題呀,定係呢間教會理解嘅信仰係唔同嘅呢?

都明白嘅,唔同嘅宗派同教義流傳落嚟嘅信仰係可以好唔同,喺呢啲不同嘅系統出嚟嘅信徒都可以有佢地嘅堅持同執著,但係如果講到拒絕接待某啲群體,咁又出自邊一度嘅教導同真理呢?呢個真係需要直接問番嗰間教會至知,但係有樣嘢唔駛查大家都會明嘅,就係對任何人嘅「尊重」。相信呢個已經係成日講嘅道理,就係每一個生命都係上帝所創造同獨一尊貴嘅,人人都應當尊重同欣賞,點解仲會有群體會被拒絕,唔通愛鄰舍嘅吩咐係有得選擇咩?就好似撒馬利亞人嘅故仔當中,當耶穌同個法利賽人對話嗰陣,法利賽人問耶穌:「究竟邊個係佢嘅鄰舍?我應該愛啲咩鄰舍?」,唔通佢係啱嘅?鄰舍係可以揀嘅?

但照聖經記載嚟睇,喺多個經卷中,每一個唔同時段所記載有關愛鄰舍嘅經文,都係針對緊要提醒我地,要就身處嘅環境,去愛喺呢個處境出現嘅鄰舍,包括有猶太人最憎嘅外邦人、撒馬利亞人,又有貧與富以及家主與奴僕關係嘅群體,仲有猶太教基督徒同外邦基督徒之間嘅紛爭等等。種種表達嘅向度都要話俾我地聽,喺唔同嘅處境,就去愛當時身邊嘅鄰舍。若果呢間教會喺自己嗰區遇到基層群體,又或上面話要拒絕嘅身心障礙群體,其實都係佢嘅鄰舍,不過佢地連接待都唔肯,都講唔上要去愛了。

事實上,就正如龔立人老師曾經分享過,愛鄰舍係一趟靈性嘅旅程,喺你生命裡不斷嘅重覆。我地需要嘅係喺當中學習同檢視自身生命,有冇從呢趟旅程中「睇見」鄰舍,「憐恤」鄰舍,以及「回應」鄰舍。鄰舍更加係冇定義嘅,同法利賽人需要「界定」鄰舍嘅定義唔同,喺唔同嘅處境你要成為遇到嘅群體嘅鄰舍,所以,耶穌會教你愛鄰舍係可以去到愛仇敵嘅層次,挑戰下大家嘅底線。

唔知道拾荒叔叔當時聽到唔接待佢會有咩諗法,若果係我,心裡面都可能會有少少Hurt同「認命」,點解認命?「因為我基層囉!因為我唔係佢地嘅一類囉,人就係習慣分門別類,分黨分派啦!我地係喺呢種意識形態到長大架嘛!有咩咁出奇姐,大驚小怪!」……

希望義工可以幫叔叔搵到一間接納佢嘅教會,等佢唔駛再「認命」,而係可以「晒命」有間教會接待佢……(「晒命」係講笑咋。)

(作者為新福事工協會關懷貧窮學校生命教育主任)

http://christiantimes.org.hk,時代論壇時代講場,2017.1.12)

Donationcall