Loading...

资料库

时代讲场文章(至2017年2月14日)

认命的拒绝……

上一篇讲到究竟教会为社区而存在,定系社区为教会而存在,进行左一啲反思,今次我地又抽左一段参与者嘅分享嚟谂下而家教会对于社区以及唔同嘅群体又有啲咩睇法。

有一组嘅参与者分享到:「行动中接触到六十多岁执纸皮嘅叔叔,好健谈嘅,返过某间大型堂会(不透露了,大教会又有几多间?),对基督教都几熟悉架,但系佢话教会话俾佢知教会较为艰难嘅位在于要去接纳基层嘅街坊呀,精神病患者呀咁样,唔识得去接待佢地或难啲同佢地一齐,于是个街坊咪知难而退。听佢讲都想搵到有接待到基层嘅教会,叫组员介绍俾佢。……」

从呢位拾荒叔叔口中嘅分享,其实都有啲几搞笑,佢到访嘅教会竟然咁坦诚同佢讲佢地接待唔到基层街坊?(都唔知好唔好欣赏佢。)咁我想问,你地系会接待啲咩人呢?都未开始讲对信仰嘅诠释啦,而系作为一个接待任何人嘅群体,竟然会有一啲人系唔会接待嘅?仲要喺街坊面前当面拒绝接待佢,其实写到呢到我都开始有啲乱,点解我地认识嘅基督教会发生呢种情况嘅呢?究竟系我地信嘅基督教有问题呀,定系呢间教会理解嘅信仰系唔同嘅呢?

都明白嘅,唔同嘅宗派同教义流传落嚟嘅信仰系可以好唔同,喺呢啲不同嘅系统出嚟嘅信徒都可以有佢地嘅坚持同执着,但系如果讲到拒绝接待某啲群体,咁又出自边一度嘅教导同真理呢?呢个真系需要直接问番嗰间教会至知,但系有样嘢唔驶查大家都会明嘅,就系对任何人嘅「尊重」。相信呢个已经系成日讲嘅道理,就系每一个生命都系上帝所创造同独一尊贵嘅,人人都应当尊重同欣赏,点解仲会有群体会被拒绝,唔通爱邻舍嘅吩咐系有得选择咩?就好似撒马利亚人嘅故仔当中,当耶稣同个法利赛人对话嗰阵,法利赛人问耶稣:「究竟边个系佢嘅邻舍?我应该爱啲咩邻舍?」,唔通佢系啱嘅?邻舍系可以拣嘅?

但照圣经记载嚟睇,喺多个经卷中,每一个唔同时段所记载有关爱邻舍嘅经文,都系针对紧要提醒我地,要就身处嘅环境,去爱喺呢个处境出现嘅邻舍,包括有犹太人最憎嘅外邦人、撒马利亚人,又有贫与富以及家主与奴仆关系嘅群体,仲有犹太教基督徒同外邦基督徒之间嘅纷争等等。种种表达嘅向度都要话俾我地听,喺唔同嘅处境,就去爱当时身边嘅邻舍。若果呢间教会喺自己嗰区遇到基层群体,又或上面话要拒绝嘅身心障碍群体,其实都系佢嘅邻舍,不过佢地连接待都唔肯,都讲唔上要去爱了。

事实上,就正如龚立人老师曾经分享过,爱邻舍系一趟灵性嘅旅程,喺你生命里不断嘅重覆。我地需要嘅系喺当中学习同检视自身生命,有冇从呢趟旅程中「睇见」邻舍,「怜恤」邻舍,以及「回应」邻舍。邻舍更加系冇定义嘅,同法利赛人需要「界定」邻舍嘅定义唔同,喺唔同嘅处境你要成为遇到嘅群体嘅邻舍,所以,耶稣会教你爱邻舍系可以去到爱仇敌嘅层次,挑战下大家嘅底线。

唔知道拾荒叔叔当时听到唔接待佢会有咩谂法,若果系我,心里面都可能会有少少Hurt同「认命」,点解认命?「因为我基层罗!因为我唔系佢地嘅一类罗,人就系习惯分门别类,分党分派啦!我地系喺呢种意识形态到长大架嘛!有咩咁出奇姐,大惊小怪!」……

希望义工可以帮叔叔搵到一间接纳佢嘅教会,等佢唔驶再「认命」,而系可以「晒命」有间教会接待佢……(「晒命」系讲笑咋。)

(作者为新福事工协会关怀贫穷学校生命教育主任)

Donationcall